يعني أيه كلمة مسيحي؟؟؟؟؟؟؟؟؟؟؟ طبعا كنت شفت مبادرة معا أمام الله من احد المدونات على النت دخلت طبعا وجدت فكرة شجاعة جدا المصارحة وكيف ان المصارحة هي بداية الحل ليس تلك المصارحة الكاذبة التي تحصل امام عدسات التلفاز في الأفطار السنوي أو تلك التي تحدث بين رجال الأمن ورجال الكنيسة فيما وراء الأبواب عندما تحدث مشكلة تهز المسيحين في مصر ولكن مصارحة حقيقية بين مصريين بعيدا عن العاب الدين والسياسة .
لا أنسى أبدا عندما تقال نكتة تخص المسيحين ويتصادف وجود شخس مسيحي كيف يسرع الجميع الى اسكاتك مع ان الكل عارف النكتة ويمكن أخونا المسيحي أكتر واحد حافظها لكن طبعا زي العادة يجب أن نظل نضحك في وجوه بعض في الوقت الذي تمتلأ القلوب في الكنائس والمساجد حقدا على الطرف الآخر لكن في النهاية يجب الا تقال النكتة ليه؟؟؟؟؟؟؟؟ عشان ما تلعبش في النسيج (نسيج الوحدة الوطنية طبعا) لكن الشيخ اللي بيدعي في كل جمعة اللهم دمر اليهود والنصارى ده ما بيدمرش النسيج ؟؟؟؟؟؟؟؟؟؟؟؟؟؟؟؟؟؟؟؟؟؟
هذا الخوف الخوف المتبادل من طرح مشاكلنا من مصارحة بعضنا البعض أتعمد دائما عندما يكون معي احد المسيحين أن أنكشه أرمي كلمة عن مشكلة عن حادثة عشان يتكلم لكن دائما اواجه بالصمت الصمت الذي ينم عن الخوف من اي نوع من المصارحة.
يعني ايه كلمة مسيحي ؟؟؟؟؟؟؟؟؟؟؟ كلمة مسيحي تعني لي حاجات كتير قوي.تعني لي اهم مظاهرة نزلت فيها لما ضرب القاضي محمود حمزة وامام نقابة المحامين أشاهد جموع من المحامين طبعا معظمهم ملتحين وزبيبة الصلاة طبعا عرفت ان هؤلاء مجموعة من محامي الأخوان المسلمين المهم ان في حد بيتكلم وماسك الميكرفون ويتحدث عن الشرعية المفقودة لهذا النظام كان بيقول كلام كبير قوي المهم انا ادور أدور أدور مين اللي بيتكلم مين اللي بيتكلم أنا عايز اعرف مين اللي بيتكلم انا شايف طرف ميكرفون بس مش عارف مين اللي بيتكلم وفي لحظة من اللحظات مال أحد شباب المحامين وإذا بالمتحدث رجل في اواسط الخمسينات (جورج أسحاق) هذا الرجل قصير القامة كبيــــــــــــــــــــــــــــــــــــــــــــــــــــــــــــر المعنى والقيمة هذا الرجل الذي يساوي في نظري المئات من الرجال المسلمين حتى وإن كنت اختلف معه أيدلوجيا لكن يظل أحترامه كمناضل في قلبي كبير جدا
يعني ايه كلمة مسيحي؟؟؟؟؟؟؟؟؟؟؟؟؟؟؟؟؟ يعني شيري شيري اللي كانت بالنسبة لي واحدة من أخواتي في الجامعة وبعزها جدا جدا وكان لها منزلة كبيرة في قلبي بس معجبة بواحد مسلم والجزمة التاني مطنش آه عارف أنها معجبة بيه وهو لازق فيها طول النهار لكن عمره ماقال لها بحبك بس لازق فيها طول النهار والبنت متعلقة بيه بأختصار علقها زي ما بيعلق أي واحدة مسلمة هي دي الوحدة الوطنية ولا بلاش والحمارة متعلقة بيه جبتها وسألتها وفهمتها هو بيضحك عليكي بيشتغلك المهم وعشان دماغها لاسعة نفضت لكلامي لحد ماهو زهق والنتيجة أنها أنضمت للشلة المتخصصة (مسيحين بس) وخسرت أنا واحدة من اعز اصدقائي .............
يعني أيه كلمة مسيحي يعني البابا شنودة هذا الرجل اللي أرفض طريقة تعامله مع ملف الأقباط في مصر هذا الرجل الذي يحاول ان يعوض
حبه للعمل السياسي من خلال موقعه الديني هذا الرجل الذي حول الأقباط الى كتلة واحدة تاتمر بأمره ( في مصري واحد ممكن يتخيل أن مصلحة مصر في انتخاب حسني مبارك الا لو كان جاهل) والبابا للأسف مش جاهل نهائيا طيب أنت محتاج تطلع مثل هذا التأيد بحكم موقعك ليه تحكم على كل الأقباط ويبقى قرار مجمع مقدس؟؟؟؟؟؟؟؟؟؟؟؟؟؟؟؟؟؟؟؟؟؟ ما نساش ايام انتخابات رئاسة الجمهورية لما كانت فيه احد السيدات المسيحيات بتأيد معانا ايمن نور وازاي انها بتكلم احد صديقاتها أنها تنتخب أيمن وكان الرد عارفه أن زفت الطين ده خرب البلد ،بس أعمل أيه غصبن عني عشان ما يبقاش حرام علي.طيب بلاش دي ازاي ممكن نتخيل أنه يعتبر جورج اسحاق خارج عن رحمة الكنيسة
حرام دي حاجة تحرق الدم
يعني أيه كلمة مسيحي ؟؟؟؟؟؟؟؟؟؟؟؟؟؟؟؟؟؟؟؟؟؟ يعني مصري، بني آدم مصري بكل روعته ونفاقه خوفه ووساخة دماغه حبه لدينه ايا ماكان وفلسفته اللي عمر مافي حد فهمها هي دي كلمة مسيحي ببساطة ومن غير أي فلسفة
Posts
