Wednesday 20 June 2007

الأخوان حماس - التجربة والنتائج

ربما يستغرب من يعرفوني عن قرب من مهاجمتي للأخوان حيث كانت نظرتي لهم دائما نظرة أحترام وتقدير بل كنت أنظر أليهم كبديل جيد للنظام الفاشل الذي يحكمنا وفي أحيان كثيرة البديل الوحيدلحكم الفاشيست الذي نعيشه منطلقا في أمالي العريضة هذه من قوة الأخوان الكبيرة في الشارع وتنظيمها الرائع وخبرتها السياسيه الممتدة على طول 70 عاما عمر الجماعه أتجادل مع أصدقائي من اليسار والعلمانيون مدافعا عن الأخوان حتى أتهم بالأنتماء اليهم فؤأكد على ليبراليتي بما لايتناقض مع الدين.
حماس تعلن أنها لن تتفاوض مع الرئيس الفلسطيني تحت أي مظلة أصحى من أمالي العريضة وأحلامي العميقة المعلقة على الأخوان المسلمين على دماء ضحايا الصراع الفلسطيني الفلسطيني (االصراع الأخواني مع رئيس ونظام أرتضى نتائج الأنتخابات التي نجحت فيها حماس ولم يزورها بل حتى لم يقف أمام النتائج الترتبة عليها وترك لحماس تكوين حكومه لها صلاحياتها بما فيها وزارة الأمن الداخلي ) اليس ذلك هو الأنقلاب غلى الديمقراطية الذي لطالما حذر منه اليساريون لو وصل الأخوان للحكم أليس هذا هو مايحذر منه أفاقي الحزب الوطني بأن حكم مبارك أفضل من الأبحار في المجهول تبدأ نظرتي للأخوان بالزعزعه وتزداد قناعتي بأن الشعب المصري بل كل الشعوب العربيه لاتستطيع العيش في ديمقراطية ولا تعرف أحترام التعددية ولاتتحمل التعايش مع الآخر وليسمح لي أصدقائي من الأخوان أن أنظر أليهم نظرة خوف وأرتياب

Monday 4 June 2007

هل نستحق الحرية ؟؟ - منقول عن مدونة بدوي الأول عشر

هل نستحق الحرية ؟؟
ده موضوع مش حكتبه كله دلوقتى وفى دماغى من قبل ما أبدأ فى البلوج ... كل ما أبدأ أفكر فيه أوصل لنفس النتيجة و مرضاش عنها و أحاول أعيد تفكير و أكذّب عقلى
بس كل حاجة بتوصل لنفس النتيجة ... أحنا كمصريين منستحقش الحرية
ازعل منى أو أكتب أى كلام براحتك ... بس برده مفيش فرق ... بنحب نبقى عبيد و نتذلل لأى كلب حتى لو من غير سبب

طبعا مش الكل لأن أصلا مفيش حاجة بيشترك فيها الكل فى أى زمان أو مكان ... بس الأغلبية المطلقة الكاسحة منا جبنا و خوافين و بيعشقوا الذل و النفاق و لحس رجلين اللى فوقيهم مهما كانت ريحتها معفنة
مينفعش تلوم الحرامى أنه سرق البيت و صحاب البيت شايفينه بيسرقه من غير ما يدافعوا عنه و الا تبقى عبيط و أهبل و تستاهل أنهم يشمتوا فيك بعد كدة لما يقولولك حد قال لك تعمل فيها أبو زيد الهلالى ...... مينفعش نلوم حسنى مبارك أنه بيسرقنا ويعذبنا و يسرطنا و يسجننا و يرجع فى الآخر يتمحلس لأسرائيل و أمريكا و فرنسا و روسيا و كل بلد محترمة و احنا راضيين بده و ساكتين
و مينفعش نلوم ممدوح اسماعيل عشان قتل ألف و ربعماية مصرى اذا كان أهل المقتولين نفسهم - قلنا برده مفيش حاجة أسمها الكل فيه حاجة أسمها الأغلبية - خدوا تعويضات و سكتوا
المصريين ميستاهلوش أنهم يبقوا أحرار لأنهم أصلا مش بيدوروا على حريتهم ...
المصريين ميستاهلوش عدالة أجتماعية لأن أصلا الفقرا راضيين بفقرهم و ساكتين و اللى يدافع عنهم عشان صعبانين عليه يبقى أهبل و عبيط ....
المصريين ميستاهلوش تعليم محترم لأنهم راضيين بالتعليم العقيم اللى بيتعلموه ولادهم و يطلعهم بهايم مش فاهمين حاجة فى أى حاجة
المصريين ميستاهلوش علاج محترم طول ما شاغلهم الوحيد ماتشات الكورة و فتاوى غسل الشراب و قص الحواجب
المصريين ميستحقوش غير اللى هما غرقانين فيه دلوقتى لأنهم ساكتين و راضيين و فيه منهم كمان اللى بيدافع عن كدة بكل استماتة ...
الأهبل اللى يدافع عن واحد مش بيدور على حقه
بس أنا مش شايف نفسى أهبل عشان بدافع عن المصريين ... عن البيت اللى اتسرق وصحابه واقفين بيتفرجوا على اللى سرقه ... لأنى أنا واحد من صحاب البيت ده
أنا مش عبيط عشان بعرض نفسى لأن كلب من كلاب الحكومة يقبض عليا فى يوم من الأيام أو يوقفنى فى مطار أو حتى يمنعنى من شغل
أنا قبل ما أكون بتاع مبادئ فأنا صاحب مصلحة مباشرة - زيك بالضبط - أن الوضع يتحسن ... التعليم و الصحة و حقوق البشر و الأكل و الشرب .... صاحب مصلحة مباشرة أن الفقرا اللى أنا مش منهم - و الحمد لله - مينضغطش عليهم لحد ما ينفجروا أو يتحولوا لمجرمين يتهجموا عليا أو على حد بحبه عشان يسرقوا منه تمن علاج مش قادرين يلاقوه أو لقمة مش قادرين يجيبوها
لو بقية صحاب البيت جبنا و أنا عملت زيهم يبقى استاهل اللى يجرى لى و لولادى بعد كدة ...
بس أنا - سامحونى يا كل اللى خايفين عليا - مش حسكت و مش حبطل أكتب و أعمل أى شئ فى امكانى - و فى أمكان كل واحد و أى واحد كتيييييير أوى يعمله - عشان أمنع الحرامى حسنى مبارك و عصابة الحزن الوثنى من أنهم يفضلوا يسرقوا فلوسنا و يسرطنوا أجسامنا و يبيعوا ثروات بلدنا لأجانب و يقتلوا أى أمل فى أى طفل أنه يكون أحسن فى يوم من الأيام
أنا - غصب عن أى حد - مصرى
و لو مفيش حاجة من اللى بعملها جابت نتيجة فعلى الأقل حيبقى ضميرى مستريح
و يوم ما حموت و اقابل ربنا حقول له أنى مخفتش من حد غيرك ... يمكن مأديتش كل حقوقك عليا ... بس كنت مؤمن بعدلك و أن محدش حيقدر يأذينى من غير أمرك
و حقول له أنى دافعت عن بلدى ضد المجرمين اللى مستوليين عليها باللى قدرتنى عليه
بس يارب الناس كانوا شاغلين نفسهم بالكورة و بفتاوى غسيل الشرابات و تقصير الهدوم و شتيمة أمريكا - اللى هما متأكدين أنها مش حتعاقبهم على كلامهم - عن أنهم يقولوا كلمة حق و يدفعوا تمن حريتهم
خليكوا فاكرين يا مصريين أن ربنا ميرضاش بالظلم ... و اللى يشوف بيته بيتسرق و يقعد ساكت من غير حتى ما يقول ولا كلمة يبقى ظالم و من الظلم أن واحد تانى غيره يجيبله حقه خصوصا لما يكون هو قادر عليه
كل واحد ابنه بيشيل شنطة مدرسة وزنها عشرة كيلو و ابنه التانى عاطل و بيشرب مية ملوثة وبيشترى أدوية مغشوشة و بيتعالج عند دكاترة متعلموش يعنى ايه علاج أصلا و بنته بتتعرض كل يوم لخطر المعاكسة و الأغتصاب ..... و بعد ده كله يفضل ساكت ميلومش غير نفسه
أفتكر كويس أنك لما بتدعى على ظالم أن أنت كمان ظالم نفسك و أهلك وولادك أنك ساكت و مش بتفتح بقك و مش بتقول كلمة حق
أحنا عمرنا ما حنستحق الحرية ولا الحياة غير لو سعينا لها و دفعنا تمنها غالى

FEEDJIT Live Traffic Feed